Hoxe realizamos o ingreso dos cartos recadados entre todos/as para colaborar coa campaña da Cruz Vermella. Recordade que irán destinados para que nenos de Ourense en exclusión social reciban este nadal un xoguete NOVO, non sexista e non bélico. Foron 607 euros.

Comentar que mesmo un traballador da oficina bancaria onde fixemos o ingreso quixo colaborar tamén a título persoal.

Grazas a todos/as pola vosa solidariedade. Feliz Nadal

O temporal que asolou Ourense a noite do 19 de decembro deixou unha pegada importante no recinto da Universidade Laboral. Temos 71 árbores caídas, con destrozos en tellados, ventás e sobre todo no polideportivo. Existen algunhas ramas e árbores que quedaron en mal estado o que fai inviable acceder ao espazo do bosque nin á zona do polideportivo que quedou pechada

Todo isto, e sentíndoo moito, fai que as actividades previstas para o último día de clase queden suspendidas e haberá clases normais.

Tampouco se poderá realizar a andaina nesa data. Postos en contacto coa Cruz Vermella acordamos facer o ingreso do diñeiro recadado para que o poidan utilizar para a compra de xoguetes como estaba previsto. Foron 607 Euros recadados. Agradecen moito a vosa colaboración e solidariedade.

Acordamos tamén que á volta de vacacións cando mellore o tempo e se retiren as árbores caídas realizaremos a andaina. Os que colaborastes economicamente non vos preocupedes porque temos listados cos nomes de todos vós por cursos e respectaremos a actividade como estaba prevista

O Departamento de matemáticas da Universidade Laboral iniciou este curso un proxecto educativo que ten moi poucos precedentes en España. Decidiron ofertar unha optativa para 1º de ESO que ao final foi a máis demandada de todas elas: "Papirofléxia e matemáticas recreativas". Tratábase de que aprenderan conceptos de xeometría que ás veces non resultan moi atractivos na aula, a través dunha actividade lúdica; neste caso a papiroflexia.

Puidemos comprobar estes meses como traballaron arreo e se divertiron tamén nas clases. O froito do seu traballo podémolo contemplar desde o mes de decembro no hall de entrada do noso IES. Está adornado con decenas de estrelas que iluminan a entrada á Laboral.

Grazas rapaces/as polo voso traballo, e seguide así de ben.

O alumnado de1º Bacharelato de Ciencias e 2º de Bacharelato que cursan Psicoloxía puxéronse mans á obra. Da teoría á práctica, de comprender as responsabilidades cos animais a realizar o primeiro obradoiro de casetas para gatos rueiros e ferais.

Grazas á Asociación "Patrulla Callejera", aprenderon a construír casetas con materiais reciclados, e por primeira vez para eles toda unha clase amadriña aos gatos que buscan fogar. Silvia e Anita, representantes da asociación fixéronlle entrega do seu carnet como clase.

Algunhas das casetas colocaranas no recinto da Laboral e outras en diferentes puntos da cidade de Ourense. 

O pasado 26 de novembro a Universidade Laboral tivo presenza no acto da presentación da guía da FP DUAL.

Este acto celebrouse no salón principal do Pazo de Congresos de Santiago. Estiveron presentes boa parte dos centros educativos da nosa Comunidade, representantes da Dirección Xeral de FP, e representantes das empresas máis importantes de Galicia.

A consellería de Educación convidounos para poñer á Universidade Laboral de Ourense como exemplo do bo traballo realizado nos últimos anos na FP DUAL.

Asistiron ao acto o noso dinamizador da FP DUAL, unha representante de GAESA e Director, para contar a nosa experiencia nos últimos anos.

A universidade laboral foi pioneira nesta modalidade educativa, comezamos no ano 2013 colaborando coa empresa carroceira UNVI con sede no Polígono de San Cibrao; e desde este curso escolar, con GAESA, empresa pertencente a un grupo industrial vasco que hai anos instalou unha factoría en Ribadavia. Para este acto GAESA tivo a amabilidade de desprazar a unha das súas directivas desde a cidade de Vitoria, para poder compartir con todos nós esa xornada.