Benvidos

Merece especial mención o seu fundador, Juan Nercellas, profesor xubilado de historia, quen dedicou gran parte dos anos nos que estivo connosco a acumular pezas, catalogalas, e restauralas.

Tamén colaboraron con el moitos outros profesores que axudaron a enriquecelo traendo pezas de aquí e de alá: Cesar Corral, Alberto Bahón, e tantos outros.

O actual museo foi rehabilitado e aberto ao público no curso escolar 2011/12, grazas á labor da profesora de historia Rosa Cid Galante,  e os seus alumnos de 4º de ESO da materia "Obradoiro de iniciativas emprendedoras". Axudaron nesta reapertura moitos compañeiros como a profesora de ciencias Petra Fernández, a profesora de lingua Galega, Carmen Blanco, o profesor de debuxo Alberto Bahón, quenes colaboraron co adecentamento do local e a rehabilitación do xardín; ou Antonio Hernández fotografiando.

Xa no curso 2012/13 constituíuse un grupo de traballo de profesorado, no que se apuntaron moitos outros para colaborar e engrandecer este proxecto ilusionante.

O museo está situado na antiga casa do conserxe da Universidade Laboral, xusto diante do que actualmente é o Centro Residencial Docente.

Aínda que contamos cun espazo reducido, temos varias salas dedicadas a aspectos específicos da nosa cultura, entre as que destacan: a labranza, a cerámica e cestería, o proceso do liño. Pero contamos tamén con moitras outras pezas de moito valor cultural, que utilizaban a cotío os nosos avós.

Neste espazo os alumnos poden ver e tocar as pezas, podendo así aprender de primeira man moitos aspectos da nosa cultura, poñéndoas en valor.

Podedes ver moitas das pezas que temos expostas nesta mesma web, e mesmo visionar un vídeo esplicativo presentado polos propios alumnos/as; pero se o que queredes é vir a visitalo, só tedes que poñervos en contacto coa súa coordinadora Rosa Cid Galante, profesora de historia do noso IES, e antiga vicedirectora, no teléfono do centro (988 226300), ou enviando un email, mediante o formulario de contacto do menú superior; para concertar unha cita nunha data determinada.

Tódalas imaxes que poderás ver desta web corresponden a pezas expostas do noso museo.